Salam, mən gəldim. Bu gün sizinlə artıq 1 həftədir aşiq olduğum Sia-nın yeni albomu olan “Everyday is Christmas” haqqında danışmaq istəyirəm. Albomun adını bir az “Dəli üçün hər gün bayramdır” deyimimizə bənzətmədim desəm yalan olar. 😀

Sia ilə ilk tanışlığım “Dove şokoladı” üçün çəkilmiş reklamda səsləndirdiyi mahnı sayəsində olub.

Reklamın hansı ilə məxsus olduğu düzü yadımda deyil. O zamanlar Shazam, SoundHound kimi istədiyimiz musiqinin adını tapmağa kömək edən mobil əlavələr də olmadığından, hər “Dove şokoladının” reklamını görəndə televizorun qarşısına qaçıb “I go to sleep” mahnısına qulaq asdığım bu gün kimi yadımdadır. Onda aşiq olmuşdum bu səsə…

2010-cu ildə səhnə həyatının qızıl dövrünü yaşayan Sia öz hit mahnıları bir kənara dursun, Christina Aguilera, Katy Perry, David Guatta, Rita Ora ve Jennifer Lopez kimi məhşur müğənnilər ilə bəstələrini paylaşmasındanmı yazsam, Rihanna üçün 14 dəqiqə ərzində yazıb bitirdiyi “Diamonds” danmı yazsam?!

Mənim üçün ayrı bir yeri olan Sia, insanda maraq doğuran həyata sahibdir və bütün bunları əhatə edən yazı yazmağa davam etsəm məqalə çox uzanacaq.

Pop musiqi dünyasının divi.

Mən demirəm, Beyonce deyir.

Özünəməxsus stilə və səsə malik Sia, Yeni il qabağı əhval ruhiyyəmə bir az daha bayram ab-u havası qatdı!

“Everyday is Christmas” albomuna daxil olan 10 mahnının hər birinin mənim üçün ayrı bir dəyəri olsa da, favorilərim “Snowman” və “Underneath the Christmas lights”-dır.

Ümid edirəm ki, albomda olan nəfis mahnılar sizi də bayram ab-u havasına kökləyərək, evinizi daha energetik əhvalla bəzəməyə kömək edən 1 nömrəli dostunuz olacaq. Hamınıza musiqi dolu günlər!